L'ALBUM DELLE ZIRUDELLE - STAGIONE 2002/2003

Rubrica a cura di Roberto Zerbini e Sergio Vecchietti

 

Zirudelle "da collezione"

ALE' ALE' BULAGGNA
ZIRUDELA DL'AN PASE
DUMELADU, DUMELATRI

Dop a quesi un sécol d'storia
cl'ha avò tant mument ed gloria
quand a s'avsinén a l'estèt
e ai finèss al campionèt
l'è tri an che al nòmm "Bulàggna"
al fa remma con "caràggna"
parchè in pochi stmen ian dsfat
tòtt qual d'bòn chi avevén fat.
Zert ca s'san sampar salvé
però avan tant tribulé,
sia la squedra che i tifus
che, in prinzèppi, i s'ern'illus.
Dop, par zonta, a s'è imparé
dai giurnel ban infurmé
che Signori, dett e fat
al n'arnova piò al cuntrat
e al pre ander, con i su pidén,
a zugher pr'i Beduén
dov i corrèn, lèss cme l'oli
i miglièrd ont ed petroli.

Sa s'è in A a gn'è gnanc un dobbi
a s'tén spandr un mocc' ed gobbi
a a s'capéss che, pr'arsparmier
da un quelch lè al cunvén taier
e al Bulaggna, con curag',
l'ha pensè ed taier l'ingag'
e acsè ai n'è etar du o tri
ca iè ches chi vagan vi.
Figurev la confusiàn
cl'ha scadnè sta dezisiàn:
i tifus, inscalmané
tòtt d'acord i s'en truvé
e igevn'esr'ènc piò d'zenczant
dal Dall'Ara fen al "Zigant"
e po tòtt in processiàn
sotta al fnestar ed Gazzàn
con trumbatt e stuflarén
a fer un bel po d'casén;
e cartlòn con evidenziè
al richiest di apasionè:
   - Beppe, al savan tòtt che lò
l'è l'as d'brescla e al vlan tgnir nò
   - Nuetr'an vlan piò Guidulèn
cl'è un po Mister e un po ciarghén;
vest cl'è brev a steri invatta
ai regalan na biziclatta
   - A n'vlan brisa sentr'a dir
ca i va vi énc al "zardinir"
   - Nò a stan a vaddar sa s'fa al sfòrz
ed cumprer un qualch rinforz
mo a s'turménta un bròtt pensir:
che Bulàggna i srà in avgnir?

Mo, fra Beduén e Bulgnis
l'è ste Beppe cl'ha dezis:
"...manc baiuc però a Bulàggna
pr'ander drètt a fer dla làggna..".
Cal pensir què an l'avan piò:
al Campiòn al sta qué con nò.
La banchina ed Guidulén:
par risolvr'al problemén
lò e al Bulàggna ian dezis
cal srà al tecnic di Bulgnis
e chi al guidan i nustar Sant
sanza nòval e sanza vant.
Par al rest a vlan sperér...
parchè al Stadio a vlan turnér
a cantèr cme tant an fa:
"IL BOLOGNA E' UNO SQUADRONE
CHE TREMARE IL MONDO FA!"

 

E' vietata qualsiasi forma di riproduzione anche parziale, sia in formato cartaceo sia informatico, dei testi riportati inqueste pagina, salvo formale richiesta di autorizzazione inviata all'indirizzo redazione@noirossobluweb.it